ڕۆژی کرێکاران خەڵات دابەشکرا

کرێکاران بونیات نەری وڵاتن : ‎ ڕۆژی یەكی ئايار كە بە ڕۆژی جیهانيی کرێکاران ناسراوە و لە هەندێک وڵاتدا بە ڕۆژی کاریش ناودەبرێت، بۆنەیەكی تایبەتی چەپڕەوانی جیهانە، لەم بۆنەیەدا سەندیکا کرێکارییەكان چەندین چالاكی دەنوێنن كە زۆرینەیان گوزارشت لە داكۆكیكردنی ماف و شایستەكانی كرێكاران دەكەن. ‎كرێكار لە كورتترین پێناسەیدا دەستی بنیاتنەری وڵات و ئاوەدانی و خۆشگوزەرانییە، بۆیە لە زۆرینەی وڵاتانیشدا ئەم ڕۆژە پشووی فەرمییە و مەبەست لەم پشووە، پشوودانی دەستی ماندووی كرێكارانە. ‎مێژووی ڕۆژی کرێکاران دەگەڕێتەوە بۆ ساڵی ١٨٦٩، کاتێک لە ئەمریکا کرێکارانی كارگەیەك لە فیلادلفیا، لەگەڵ هەندێک لە کرێکارانی پێڵاو و مۆبیلیات، و کانە بەردینەكان، وەک ڕێکخراوێکی سەندیکایی "شۆڕشگێڕانی کار"یان پێکهێنا، کە لە خەباتدایە بۆ باشترکردنی کرێ و کەمکردنەوەی کاتەکانی کارکردن، و دەستەبەری كۆمەڵایەتی و تەندروستی كرێكاران، لەو كاتەوە ڕۆژی یەکەمی مانگی ئایار وەک ڕۆژێکی سیمبولیی سیمایەكی تایبەت بەخۆی وەرگرتووە و دەرفەتێكیشە بۆ نوێکردنەوەی داواکارییەکانیان و بەدیهێنانی خواستەكانیان. ‎هەڵبەت لە تەواوی عیراق و هەرێمی كوردستاندا ڕۆژی كرێكاران پشووی فەرمییە، دەزگا و سەندیكا و ڕێكخراوە كرێكارییەكان چەندین چالاكی و ئاهەنگ و گردبوونەوەی شارستانییانە ئەنجام دەدەن، تیایدا داواكاری و خواست و پێداویستییەكانی كرێكاران بەپێی سەردەم و بارودۆخ دەخرێنەڕوو، بەڵام ئەوەی جێگەی هەڵوەستەكردن و سەنجدانە، بەشێكی زۆری كرێكاران لە وڵاتی ئێمە و وڵاتانی ڕۆژهەڵاتی ناوەڕاست بەگشتی، سەرەڕای ئەوەی داواكاری و خواستەكانیان نەهاتۆتەدی، لە ڕۆژی یەكی ئایاریشدا هەر لە كاركردن بەردەوامن، ئەوەیش وایكردووە ڕۆژی جیهانیی كرێكاران لە بۆنەیەكی فەرمی و تایبەتدا، بگۆڕێت بۆ بۆنەیەكی سیمبولی و هیچ لە بارودۆخ و ژیان و گوزەرانی كرێكاران نەگۆڕێت.. شلێر سەعید،،